Akademııalyq máseleler jónindegi prorektor Erbol Isaqaevtyń aıtýynsha búginde ýnıversıtette 48 oqý baǵdarlamasy sheńberinde mamandar, 75 mamandyq negizinde bakalavrlar, magıstrler, PhD doktorlary ázirlenedi. Sońǵy júrgizilgen monıtorıng boıynsha bilim sapasy jaǵynan JOO arasynda 13-shi oryndy ıelengen. Endi óńirdegi joǵary bilimdi dárigerler tapshylyǵyn joıý úshin tyń baǵdarlamany júzege asyrý qolǵa alynbaq.
«Baǵdarlamalyq tizimge tehnıkalyq ǵylymdar men tehnologııa, aýyl sharýashylyǵy ǵylymdary, áleýmettik, ekonomıka, bıznes salasy jáne medısına baǵytynda 29 mamandyq kirgizilip otyr. Aldaǵy oqý jylynan bastap medısınalyq mamandyqqa 30 úmitker qabyldanady. Bes jyl boıy jalpy medısınaǵa, qalǵan eki jylda hırýrgııa, akýsher-gınekolog, pedıatr jáne jalpy tájirıbe dárigerlerine bólip oqytylady», deıdi E. Isaqaev.
Qazir aldyn ala daıyndyq sharalary júrgizilip jatqan kórinedi. Ol úshin birqatar emdeý mekemelerimen áriptestik memorandýmǵa qol qoıylypty. 300-500 mıllıon teńgege qajetti qurylǵylar satyp alynyp, kabınetter jabdyqtalmaq. Oqý bastapqy kezeńde Soltústik Qazaqstan medısınalyq kolledjinde júrgiziletin bolsa, keıin ýnıversıtet qabyrǵasyna kóshiriledi.
Bolashaq aq halatty abjal jandarǵa kimder dáris oqıdy degen saýalǵa 1 medısına ǵylymdarynyń doktory, 8 PhD doktory, jergilikti bilikti dárigerler, ýnıversıtettiń áleýeti jumyldyrylatynyn jetkizdi. Jańa ashylatyn fakýltette ınternatýra ashý jaıy da oılastyrylǵan.
О́mir ESQALI,
«Egemen Qazaqstan»
Soltústik Qazaqstan oblysy
